市場熱線：南航大折讓夠吸引

恒指尋日上晝弱、下晝強，收市微升13點，成交得620億元。如果把持唔定，好容易左一巴、右一巴。兩隻藍籌出口股一在天、一在地，利豐（00494）升3.5%，思捷（00330）再跌2.8%收報八年低位22.05元，好多股友問隻股幾時先可以見底，但睇股價圖真係一把「下墜中的刀子」，惟思捷得284億元市值，淨現金有50億元，PE6倍半，息率7厘半，但相同道理中動向（03818）更加離譜，所以魚缸「便宜莫貪」係常理。

內房股借勢作回吐

「寧買當頭起」莫過於「車神」華晨（01114），但其他車股如比亞迪（01211）同吉汽（00175）就銷路倒退。古勝再攞體育用品股做例子，李寧（02331）同中動向唔掂其實係大勢所趨，全世界都係「三間」同「一剔」壟斷，連曾經威過一時嘅Reebok同Umbro都被「兩大」收購，原因係「兩大」落本贊助體育明星同球隊，連「國寶」李娜同劉翔均由「一剔牌」贊助，國產貨層次有距離，而且5大牌子都話目標開萬間分店，豈不是累鬥累？

內房股炒得咁高興，阿爺即刻澆一盤冷水，傳限購令可能延伸到二三線城市，內房股藉口回吐好正常，但個別如潤地（01109）、方興（00817）等仲有得升，大戶儲咗年幾貨，等「風聲」冇咁緊可能又炒過。

京滬高鐵4日內3度故障，高鐵有難邊個最開心？唔使問梗係飛機啦！高鐵嘅正面作用係幫飛機改善服務，當然，飛機亦問題多多，誤點嚴重，但如果高鐵一樣咁多事故，大家價錢差唔多，可能好多乘客會選搭飛機，話晒時間點都會快啲。

高鐵競爭比預期小

高鐵用電，飛機用航空煤油，好明顯成本架構唔同，初哥都知油價高對飛機股不利，祖國早前宣布航空煤油價格將每個月調整一次，當日飛機股即跌，古勝都唔係好明白，改革令飛機油更「貼價」，有乜唔好？

本周初有段新聞係國務院今年內會出新政策撐民航業，仲話5年內投資超過1.5億人仔，以及三大飛機股有機會重組。其實三大重組講咗好多年，但意識形態唔同，隨時講到下世紀。

三大飛機股當中，以南航（01055）走勢最標青，雖然升咗唔少，但H股仍較A股折讓超過一半，係三大之中折讓最多嘅一間。公司六月份客運量按年增長3.2%，載客率亦上升1.6個百分點至80.8%，弱勢公司若能扭轉弱勢就非同小可。而高鐵競爭肯定比預期小，將造就飛機股有力進一步反彈。

戰報

YGM貿易（00375）+12%

股博士上周三睇中YGM貿易，隻股由當日低位21.4元起步，昨日升至24元水平，跟足可贏12%。

天能動力（00819）+12%

天能動力再度發威，昨日勁升近8%，帥哥在七月六日叫大家上車，以當日低位計亦可賺逾12%。

古勝