由鴻海集團斥資9.75億元打造，有「台北秋葉原」之稱嘅台北資訊園區喺尋日動土，鴻海老闆郭台銘着上白色POLO衫、牛仔褲現身，佢話專登以「自以為年輕嘅打扮」亮相，因為着西裝及打領呔「好似LKK」。
LKK係台灣潮語「老叩叩」嘅簡稱，即係老餅咁解。郭台銘其實想配合新項目係支持台灣年輕人發揮創意及圓夢嘅主題，佢都有幫自己解嘲。「60幾歲嘅人着成咁，扮後生……但其實我仲年輕，與兩歲幾嘅女玩，好開心」。
呢個新項目係台北市難得一見嘅BOT計劃，郭台銘好自豪話「冇花過一毫子，冇打過一個電話，亦冇請人食一餐飯，但就用高票贏到項目」。喺動土典禮之前，有人整翻咗講台嘅花，佢就話係「好意頭」，以後客人會「花錢花翻了」，我哋「賺錢賺翻了」，連「交稅都交翻了」。
儀式結束後，郭台銘特登去場邊飲食區，見到仲剩低好多點心盒，於是叮囑記者「人人要攞一盒」！佢又同工作人員拎咗兩盒，帶番屋企畀細路，仲有老婆、媽媽、大仔，一盒盒咁疊上去，攞滿6盒至走，睇嚟佢確係心情靚爆。