新鴻基地產（00016）連續第3年資助「年輕作家創作比賽」，培育下一代作家，佢哋唔單只出錢，仲好出力，新地副主席兼董事總經理郭炳聯尋日就親自出嚟宣傳，絲絲見到佢心情勁靚，唔知係咪因為新地旗下新盤「瓏璽」銷情熱爆。
呢個比賽係由新地與三聯書店合辦，已經係第3年舉辦，過去成功資助多位具潛質兼有志成為作家嘅年輕人出版第一本書，今年佢哋亦繼續請嚟多位專業嘅資深創作人挑選，並個別指導參賽者，最後選出8位得獎者，帶佢哋踏上作家之路。
今年比賽反應熱烈，共收到1,200份參賽作品，參賽者年齡由8至40歲，最後得獎嘅8位作家全部都係「八十後」，創作力澎湃，創作形式包括漫畫、散文及小說，題材亦五花八門，由克服紅斑狼瘡症嘅經歷以至戲院兼職嘅趣怪見聞都有。
郭炳聯話，佢哋嘅成功令佢深信香港新一代潛力無限，佢亦都多謝擔任評審嘅創作人，話一個好嘅師傅對年輕人成長好重要，又宣布成立一個「年輕作家同學會」，邀請所有得獎作家加入，期望佢哋未來可為培育後輩出一分力。