小加總裁汗流浹背
現場所見，新數據中心仍然係地盤一個，工人正加快趕工，為咗各出席人士嘅安全，無論係政府高官、工作人員及傳媒等，都一律規定要戴上安全帽先可入內。絲絲見識少，以為安全帽只有黃色，點知發現在場竟有3種顏色嘅安全帽，而財庫局副局長梁鳳儀、財庫局常任秘書區璟智、港交所主席夏佳理、行政總裁李小加及港交所董事等人，佢哋戴嘅安全帽顏色就零舍唔同，係閃令令嘅金色，就知道係「高人一等」。港交所其他職員就戴上白色安全帽，至於絲絲，就梗係最普通嘅黃色啦！
尋日天氣熱，現場較為悶焗，路面又沙塵滾滾，大家早已熱到不得了，小加總裁更汗流浹背，更多次喺答問環節中話：「大家咁熱，不要咁辛苦，早點返去休息。」