鄭海泉（Vincent）喺五月底滙豐控股（00005）開埋股東會後，已正式退下來，獅子銀行尋日公布一項新人事任命，就係委任王冬勝（Peter）出任滙豐中國董事長，喺度恭喜Peter再兼多一項重要管理職務。
依家係滙控顧問嘅Vincent喺五月榮休，卸下集團執董、滙豐中國董事長等職務，當時查史美倫隨即入董事會，成為非執董，滙豐中國董事長呢個極具象徵性嘅職位一直懸空，直到尋日，滙豐正式任命Peter出任，並已獲得監管機構批准兼生效。
其實Peter早喺○七年已經係滙豐中國副董事長兼非執董，協力推進集團A股上市，其後喺○九年更上一層樓，成為滙豐亞太區行政總裁，Vincent退休後，由Peter出任滙豐中國董事長亦可算係最適合。
身兼滙豐中國董事長嘅Peter話，內地係帶動全球經濟增長嘅引擎，亦都係滙豐新興市場戰略核心所在，期望憑藉自身品牌優勢，可進一步提升作為外資行喺內地嘅領先地位。
集團行政總裁歐智華喺今年初正式上任後，隨即重訂發展策略，仲大鑼大鼓咁搞咗個投資者策略日，令投資者可以一次過全面睇晒滙控各方面嘅策略發展，亞洲區業務策略簡報更加係壓軸登場。
歐智華唔只一次公開大讚Peter打理亞太業務做得非常出色，就連大班屋亦讓出畀Peter入住，可見Peter嘅地位非同凡響。