市場熱線：聯塑上升動力強

祖國周六同周日連續公布幾個重要經濟數據，CPI已經高過預期，出入口亦增長放緩，但A股牛牛皮皮之下仍然可以微升，反而標普期指跌成10點。其實外圍經濟好差，老美聖誕定單就要交貨，聽講唔少撻訂，下月開始嘅聖誕銷售如果差強人意嘅話，QE3咪話冇機。

體育用品股續被洗

跌市之中，內房同水泥仍算硬淨，飛機股亦算唔錯，皆因又有消息話國務院會喺今年內出招幫民航業，亦重提「三大」重組。不過，內銀股同體育用品股繼續成為大輸家，內銀都係減持同地方債兩單嘢搞搞震，「不明朗」嘅嚴重性係大過「風險」因素，而散戶鍾意玩內銀股，結果愈撈愈低，反而內房股愈升愈冇人敢買。

體育用品股大洗倉，由李寧（02331）、中動向（03818）傳染到其他體育用品股一鑊熟，孖屐對整個行業都投不信任票。細摩更加將中動向目標價調低到1蚊雞，以公司有淨現金60億人仔計算（即每股1.28元），咪即係目標價低過現金值？內地傳媒尋日有單新聞話五大國產體育品牌集體加價，但加價未必係好事，因為佢哋同「三間」及「一剔」嘅價格差距愈來愈細，作為消費者你會點揀？

興達（01899）突然大跌13.4%，原來「高佬盛」話自己喺份報告計錯數，所以將目標價由9.44元下調到7.83元，並剔出確信買入名單，咁都得？聽份報告講買入嘅股民真係唔好彩。呢排好多無名腫毒，博耳電力（01685）連續兩日大插插，華寶（00336）跌完又升都唔知乜事，天行（00993）高開大爆再倒跌10%，呢輪買股票幾提心吊膽。

有消息話新一批藥品限價將出台，芬佬最愛三大製藥股：聯邦（03933）、神威（02877）同中生製藥（01177）都跌5%左右，尤其係聯邦，三支大陰燭破埋六月底部，跟董事買貨未必有着數。

半新股呢排好醒，尋日輪到翔宇疏浚（00871），另有一隻聯塑（02128）喺上市時冇乜人睇起，但今年由頭到尾都咁好味。公司喺今年初曾經批股，但一直有消息話有意再批多次，皆因大股東上市時揸75%，批完股仍揸住70%，所以大把條件減持，批多啲街貨出去一齊玩，而上次只係小試牛刀性質。

多項工程刺激需求

聯塑依家市值係200億銀，三成街貨即係60億，但相信真正落入散戶手上嘅貨遠低過呢個數目，即係貨乾易炒。間公司主要做膠管，聽落好似係低技術行業，所以冇人吼係正常。不過，公司股價飛天嘅最重大突破係水利工程列入《一號文件》，水利要用到好多水管，跟住阿爺話要起1,000萬套保障房，起樓亦要用好多建築膠管。

聯塑往績PE約13倍，今年預測PE係11.4倍，水利屬於國策，聯塑呢兩、三年應該有唔錯增長。至於傳聞中嘅批股最快要到下個月派完成績表之後，業績應該唔錯，所以呢排會有唔錯上升動力。

古勝