孖妹缸湖遊：魚缸傳說堅定流？

中環魚缸驚見宮雪花！

對於以超齡參選亞洲小姐嘅宮雪花，大家一定記憶猶新，不過近年孖妹甚少喺電視見到佢，有人爆料話花姐已經退出娛樂圈，仲喺中環某間大型證券行全職炒股添，究竟係真唔係？高妹竟然話可以回答呢個問題喎！

高妹話：「呢單嘢係真嘅！因為我親眼見過花姐，不過佢係大戶，所以有自己房坐，普通散戶唔會喺大廳見到佢嘅芳蹤架！佢係咪全職散戶就唔清楚，如果散戶想一睹花姐，咁就要碰運氣喇！我仲知道花姐個仔以前喺呢間中環證券行做過股票分析員，不過做咗半年就轉行做法國餐廚師喇，大家話係咪好神奇呢！」

元朗「炒輪王」年賺1億？

孖妹向來炒股唔炒輪，因為炒輪風險太大，不過我哋聽元朗Kitty媽（化名）報料話：「元朗凱基證券有個全職男性散戶，年約65歲，佢炒輪好勁o架，喺○七年就用5萬蚊本金密密炒輪，一年內竟然賺咗一億元，真係買親都贏架！」

「元朗股神」曾錦安拆解「炒輪王」身份：「我識呢個人，佢仲係大好友添，乜嘢窩輪都炒架！以前我哋仲成日一齊去食Lunch，不過我冇問番佢呢件傳聞喎！但我知佢喺八七年股災時輸過800萬元，嗰個年代嘅800萬元仲多過依家嘅一億元呀，所以我相信佢係有錢人，不過話佢用5萬蚊炒輪炒到變一億元就有啲離譜囉，係咪大家傳錯個數目呀？我覺得500萬元炒到變一億元都有啲可能嘅，但都真係要次次買都贏先得喎。」

郭Sir曾當李小龍替身？

邊位股評人曾經喺電影《死亡遊戲》為武打巨星李小龍做過替身？咪係耀才證券市務總監郭思治囉！孖妹聽金鐘David仔（化名）講：「郭Sir未入金融界講股之前，曾經拍過幾部電視劇o架，後期好似話仲去埋台灣拍電影添。」講真，郭Sir出咗名鍾意玩健身，而且仲有副完美健碩嘅身材，所以散戶都叫佢做「股壇大隻佬」或「股壇李小龍」，不過究竟佢有冇做過李小龍嘅替身，咁就要佢親自回應喇！

郭Sir話：「呢個傳聞傳咗好耐喇，我亦澄清過好多次話冇，都唔知點解今時今日仲傳緊。其實李小龍喺33歲時去世，而我當年只有18歲，嗰陣時我嘅身材『奀挑鬼命』，點做到佢替身呀？」

輪商發行人「亂點」散戶搞到絕迹某魚缸？

孖妹知道唔少窩輪發行人經常會落魚缸推介窩輪，但根據北角雞蛋仔（化名）報料話，喺區內嘅某間中資證券行內，有個叫做陳伯（化名）嘅散戶周圍唱某間窩輪發行人亂咁推輪，累佢成日輸錢，聽聞呢位輪商曾向陳伯講過：「信我喇，買呢隻輪一定有錢賺嘅！」卒之陳伯信一次就錯一次，所以成日喺魚缸內向其他散戶講呢件事，搞到呢位輪商又驚又怕，以後都唔敢再去呢間魚缸推輪！

為咗求證呢單傳聞，孖妹上周就直踩呢間行，深入呢間中資魚缸搵陳伯傾偈，點知駐場經理就話陳伯整親隻腳，近期都冇出現喎！

於是我哋就問經理知唔知呢件事，佢話未經上司批准，唔可以亂咁接受訪問，所以唔回應喇。

既然係咁，孖妹惟有問吓啲窩輪界人士，查探呢位「亂點輪商」嘅真面目。

渣打股票衍生及中介銷售部認股證銷售董事翁世權話：「我第一次聽到呢件事喎，其實輪商到證券行，第一係向散戶解釋窩輪嘅投資方法及風險；第二係教散戶點樣因應不同市況去揀窩輪，但我哋係唔會向散戶灌輸個人嘅投資想法或提供投資意見。雖然我冇聽過呢個傳聞，不過，散戶要知道投資一定涉及風險，冇嘢係可以穩賺嘅！」

聽咗呢幾個傳聞，唔知散戶有乜感受呢？講真，凡事都應該「大膽假設，小心求證」，話明傳聞嘛，即係未必真有其事囉！如果你唔係親眼見到或親耳聽到，就唔好妄下判斷，以免冤枉好人喇！以後聽到一啲「魚缸傳說」，笑吓咪算囉，唔好太認真，反而投資就要小心謹慎，要記住邊有咁多內幕消息？炒股始終都係要靠自己！

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk