市場熱線：上實低風險中回報

禍不單行嘅係，美國失業率再升到9.2%，非農職位增幅亦好少，但上周五道指臨尾跌幅大為收窄，不過港股ADR仍要跌1%。恒指上周五雖然升近200點，但今日打回原形機會相當大，近日喺牛熊分界線玩單槓，今個禮拜都係睇美國多過睇中國，美國業績期加埋阿伯出席國會聽證。

2G手機反而有肉食

上周五連最落後嘅中國無線（02369）都炒埋，可能「金手指」批貨已去得八八九九，所以出現報復性反彈，隻股最高炒到5.8元，依家得番三分一唔到，下個月派成績表可以睇吓係唔係咁差。同係做手機，TCL通訊（02618）就差天共地，皆因一個做2G、一個做3G，乜唔係3G好景嘅咩？錯也！3G競爭大，點同「哎瘋」爭？TCL賣2G反而山大斬埋有柴。

民企股好似又被洗，當然每日跌幅榜總有幾隻民企股唔算特別，但有幾隻跌得幾離奇，雨潤（01068）有幾大芬佬增持升得好哋哋，但上周五回吐4.5%，瑞年（02010）上個禮拜出現三支大陰燭，間公司仲每日勤力回購，另外博耳電力（01685）插9.4%，保利協鑫（03800）跌5.5%亦唔尋常。李寧（02331）同中動向（03818）被洗倉可以解釋為業務表現差，但條數令人信唔過就拖累埋其他民企，就算訂貨會話有高增長，到頭來存貨要自己哽番。

依利安達（01151）上市，總算高過新加坡股價，佢阿媽同姐妹命運就好唔同，阿媽建滔（00148）升8.8%，不過建滔板（01888）就創52周新低。祖國地主股又再升過，佢哋上半年賣樓數據令人跌眼鏡，加上憧憬下半年宏調鬆手，內房股呢兩個禮拜升勢同三月嗰次有得比，剩低隻高危分子綠地（03900）反而要跌。

資產折讓已見吸引

上實（00363）舊年重組，將受孖屐歡迎嘅醫藥同消費業務賣咗，又買入成為調控對象嘅房地產業務，股價係點唔難估，由40蚊樓上跌到25個幾，但呢個位可能因資產折讓大嘅關係，支持力相當強，阿媽仲出手增持，結果股價喺25個幾形成雙底。依家內房股氣氛好番唔少，應該繼續有反彈，而10日線亦啱啱升穿50日線。

上實已將上實城開（00563）作為房地產旗艦，後者泊咗個大碼頭，但點解升唔起的確令人費解。上實業務包括地產、水務、公路、酒店、消費品等，「高佬盛」四月時出報告建議買入，話公司NAV有53.4元，目標價睇40蚊，土地成本低又質素高，而旗下「中環水務」亦踏入收成期。上實股價表現的確傷咗唔少粉絲心，但沉咗咁耐，博反彈又好、博翻身又好，都係低風險、中回報嘅投資。

戰報

億和控股（00838）+11%

古晨上周五睇中億和，當日隨即爆升，最低位2.67元，至全日高位2.96元，最多可賺近11%。

中糧包裝（00906）+11%

中糧包裝上月二十九日被帥哥吼中，當日低見4.25元，如睇準上周五高位4.74元出貨，獲利逾11%。

古勝