依家香港乜嘢都要諮詢市場，港交所（00388）行政總裁李小加亦好明白乜嘢都要同人傾嘅道理。佢喺上任後推出一連串新動作，包括明年落實第二階段延長港股交易時間、增設期指夜市、重提收市競價時段等具爭議性嘅改革建議，令到啲港資經紀非常不滿，不過小加總裁就話，香港就係一個可以表達不同意見嘅地方，有爭議唔緊要，咁先證明佢有做嘢，佢仲好歡迎市場繼續討論。
小加提出過好多改革方案，不過就絲絲所見，業界就似乎唔多Like，港資經紀更認為改革措施愈嚟愈向外資大行傾斜。
小加就話，好歡迎與業界一齊討論及改進，而佢自己亦唔係一個剛愎自用以及一意孤行嘅人，更唔會盲目追求，不過亦唔會一遇到反對聲音就退縮。
佢話一直有聽取各界意見，依家耐唔耐會與業界食吓飯，傾吓佢哋嘅問題，佢仲話再食都會有肚腩添，不過照絲絲睇嚟，小加總裁呢期都要繼續食飯喇！
另外，對於上半年香港失落全球新股集資額嘅第一位，小加總裁就話，冇可能永遠做第一，排到第二都叫唔錯啦。
余絲韻