市場熱線：中通服穩健之選

國壽（02628）忍辱負重咗咁耐，尋日升4.5%威番次，憧憬加息同A股持續反彈都係刺激股價原因。尋日好多股都發威，內房、汽車、水泥、鐘錶同保險股由上個禮拜強到依家，總之最緊要係跟勢，六月份無論你揀股點叻都多數輸錢，呢幾日求其揀隻都掂。

炒新股用相反理論

如果閣下走偏鋒撈洗倉股就攞嚟衰，雨潤（01068）死貓彈兩日已經冇力，華寶（00336）再插一棍，朝早曾下瀉22%，收市跌幅收窄一半，成交同沽空亦勁，唔通成為下一個空軍目標？但已經跌到咁低，令人懷疑此時沽空仲有乜肉食。

新股有冇得炒主要係相反理論，上周五兩隻有得執，尋日兩隻朝早撲落去就中伏，但新股市場起碼有生機，近日招股嘅有順風光電（01165）、高鑫零售（06808）同青蛙王子（01259），後兩者有內需概念應該反應唔差，遲吓有好多大大隻嘅新股排隊上市，包括兩間銀行、兩間證券、兩隻工程機械同1隻保險，但呢排新股翻生主要係散戶怕怕唔敢認購，令到貨源提早歸邊，如果跟住幾隻新股散戶認購反應踴躍嘅話，又唔會升得咁癲益你。

前年年尾上市嘅德國公司星亮（00955）以1.63倍溢價提全購，真係禾桿冚珍珠，但呢類公司可遇不可求，所以咪發白日夢。

喺中信資源（01205）跌穿供股價嘅時候，古勝都有提住，呢幾日拿拿臨重上供股價就走晒寶。講到供股，中通服（00552）宣布供股已超過3個月，但連供股價幾多錢同幾時除權都唔知，不過供股比例已由10供4調低到10供2，集資額由60億人仔減到40億人仔。H股供股麻煩多多，要由國資委同中證監審批，所以搞咁耐都未掂，公司又唔係莫財，點解要供股實在難明。

發掘海外市場商機

好多公司都鍾意供股，因為係大股東吸平貨同洗牌嘅機會，所以供完股之後嘅股價表現多數唔差（向下炒嘅公司除外）。中通服比較特別，一向穩穩陣陣，PE一直12倍附近，每年盈利增長雙位數字，飽你唔死、餓你唔親，所以股價亦長期打橫行。不過，今次供股講明目的係開拓海外市場，間公司不嬲主力做祖國三大電訊商生意，如果喺印度等其他國家市場爭取到生意嘅話，將會係一個盈利增長嘅突破點，橫掂隻股下跌嘅風險唔大，有閒錢不妨博一博，或者買個威士返嚟供股亦得。

戰報

敏實集團（00425）+23%

古晨上周一睇中隻敏實，由當日低位10.72元，搶高至昨日高位13.2元，賺盡者可獲利逾23%。

熔盛重工（01101）+20%

熔盛上周二畀高仁吼中，由當日低位4.19元後升至昨日高位5.04元，累計賺逾兩成。

古勝