內地體育用品股好鍾意搵明星做品牌代言人，特步（01368）亦唔例外，佢哋最近就搵咗知名藝人韓庚做品牌代言人，為期兩年，喺尋日已經簽約。韓庚係特步咁耐以嚟嘅第4位代言人，佢嘅「前輩」包括謝霆鋒、蔡依林及潘瑋柏。
韓庚曾經係南韓著名樂隊組合Super Junior中唯一嘅中國成員，佢係中國嘅赫哲族人，呢個組合迷倒唔少亞洲「粉絲」，絲絲就最鍾意《Sorry, Sorry》呢隻歌。韓庚喺大陸及東南亞地區擁有極高嘅知名度，攞過好多與音樂有關嘅獎項，依家喺網絡上更加係超人氣明星，佢嘅微博已獲約450萬人關注，而且佢喺內地嘅社交網站「貼吧」亦擁有約10萬會員，咁鬼紅，唔怪得特步請佢做代言人啦。
特步主席丁水波猛讚韓庚年輕、充滿陽光又具活力嘅形象，佢透露，韓庚將與特步舉行一連串嘅人氣宣傳活動，打響頭炮嘅係「庚女郎」選舉。呢個選舉係一個由公眾參與嘅選拔活動，以選秀形式選出嘅優勝者，可以與韓庚合作拍攝特步嘅宣傳海報。
余絲韻