睇得武俠小說多都知道，喺毒藥附近好容易會搵到解藥，絲絲尋日就睇到一宗幾特別嘅收購通告，主要喺大陸經銷五糧液、香煙等「毒物」嘅銀基（00886）就話，已經與「百年老號」廣州潘高壽訂立咗意向，公司將會向廣州藥業旗下嘅潘高壽，收購一間名為天然保健品嘅公司少於50%股權。
銀基喺通告內，冇詳細解釋向潘高壽收購公司股權計劃背後嘅原因，有心水清嘅人就估計，銀基或者係想逐步「改邪歸正」，轉行做番啲五花茶、廿四味等保健飲料，實行老少咸宜。不過咪話絲絲抱小人之心，睇嚟銀基係想嚟個「大小通吃」就真，將五糧液、香煙以及啲保健產品擺埋一齊作綑綁式銷售，到時食煙飲酒令到喉嚨痛，飲番兩啖潘高壽嘅川貝枇杷膏，就有咳都唔使怕啦！
余絲韻