絲絲講場：永旺精品超市力吸貴客
隨着港人愈嚟愈追求優質生活，因此伴隨大家成長嘅日資百貨吉之島都要變格喇。永旺（00984）嘅首間高檔精品超市喺尋日正式開幕，主打嘅就係特色貨品及貴價貨，但原來超市內嘅貨品只有三成係採購自日本，其他都係來自歐美等地。絲絲好奇想知係咪因為日本地震後影響咗採購比重，不過據講佢哋旗下超市一直都賣世界各地貨品，務求畀消費者多啲選擇喎。
紅酒專區特快「Air」
咁講番啲特色貨品，永旺董事總經理林文鈿就介紹話，因應依家咁多人鍾意得閒與三五知己摸吓酒杯底，所以喺精品超市內有個紅酒專區。飲開紅酒嘅人都知，飲之前要適當咁將紅酒「Air」吓，所以佢哋入咗一啲好特別嘅紅酒杯，斟酒落去4分鐘就等於「呼吸」咗兩粒鐘，最啱乜都要快嘅港人。另外，精品超市仲有日本進口嘅黑豚肉，每1,000克就要賣800幾蚊，而且目前只有呢間超市有得賣，認真矜貴。
林文鈿話，佢哋目標係有三成客會係內地遊客，所以都有賣好多貴價手信，好似有雪茄及鮑魚等，好睇又有面子咁話。
余絲韻