金銀業貿易場理事長張德熙近期正忙於籌備人民幣公斤條黃金產品，不過佢愈忙愈開心，對產品抱有好大信心，仲誇下海口話，依家貿易場牌價高達700萬至800萬元喺新產品及盈利支持下，佢好希望牌價喺任內可更上一層樓，升至1,200萬至1,500萬元。
張德熙去年才上任理事長，明年要再選，不過最多可做兩屆，換言之佢任期最長可做到二○一四年，貿易場牌價喺呢段時間能否升到佢心目中價位，大家就要拭目以待！
一向係黃金大好友嘅佢，估金價走勢向來好準，佢估依家金價會喺1,350至1,450美元橫行，今年十月料會再升，有機會見1,650美元。
為咗人民幣公斤條黃金，張德熙會喺今年底或明年初去亞洲市場推介，包括印尼、馬來西亞、菲律賓及台灣。佢對人民幣公斤條黃金產品真係好樂觀，只擔心初期市場反應太大，故計劃初期會有成交合約上限，例如一周嘅成交合約上限係一噸（1,000公斤）， 每間行嘅合約不能超過100公斤，佢預期總體成交一年可增長三成。
人民幣公斤條黃金產品合約入場費三萬多元，但散戶可透過經紀安排拆細嚟玩，最細係拆到十分之一，即約3,000元入場，名副其實細細粒容易食。
唔講唔知，喺港交所（00388）上市前，張德熙有6個證券牌及3個期貨牌。佢話港交所股價升到十幾廿蚊時，佢賣咗一轉，之後再升又再賣埋，當時猛讚自己眼光好，賺咗唔少，點知港交所之後仲係咁升，最高升到二百幾蚊，如果佢仍揸住唔賣，閒閒哋值7、8億元，所以佢猛敲自己個頭呻笨！
余絲韻