市場熱線：中興發展空間大

A股亦大部分時間偏軟，但臨尾發力，滬綜指微升唔夠1點，水泥A股先跌後升，但香港嘅水泥股就獲利回吐，尋日到藥股威，主要係炒話就快出台嘅生物醫藥產業發展「十二五」規劃，但恐防只係短癮，因為降低藥價已經成為國策。同公路一樣，依家5部委聯手「清理」收費公路，北控（00392）旗下嘅首都機場高速率先被開刀，由10蚊人仔減到5蚊，計減幅咪話唔犀利，但一條路對北控咁大間公司影響有限，對公路股則關係重大。

個市冇乜好講，都係講雨潤（01068）最刺激，管理層乜招都出晒，講埋頭5個月營業額大增，又暗示埋增持，但開波升勢只係眨吓眼就冇咗，而且好快成交已超過30億元，沽盤好似倒水咁，低見18.8元，10點打後回穩，但一到20蚊又捱沽，全日跌近6%收報19.38元，成交45億元拋離晒其他股。

手袋股淡市威威

雖然古語有話謠言止於智者，但現實世界係謠言非常恐怖，尤其係依家資訊年代，一個無中生有嘅電郵或網絡傳言已經可以搞到天翻地覆，隨時「盲搶鹽」或銀行擠提。雨潤幾日內市值冇咗150億元，古勝前晚喺網上討論區見有唔少負面嘅留言，配合埋媒體攻勢，可以見識到乜嘢叫做全方位唱淡。

新股呢排吹淡風，但手袋股就威晒，前排米蘭站（01150）一枝獨秀，啱啱以介紹上市嘅理文手袋（01488）狂升29%，「趴打」（01913）股價亦一啲都唔趴，高招股價超過一成。手袋威純粹係巧合，冇乜特別概念，但消費股幾時都係題材，遲啲祖國會落實提高每月免稅額到3,000蚊人仔，可以帶動整體內需。

呢排對民企股都應該避忌吓，因為唔知會唔會成為下一個攻擊目標。講到穩陣，中興通訊（00763）屬數一數二，3G電訊商大火併，依家仲係投資高峰期，跟住幾年輪到4G，海外市場仍有好大發展空間，公司開始大力發展雲計算業務，所以未來每年保持兩成以上增長唔成問題。

智能手機銷情佳

中興往績PE約23.5倍，預測PE約20倍，計PEG約1倍左右唔平唔貴，但勝在穩陣可靠。講到雲端，早排iCloud成為新聞，中興預期雲計算相關收入未來會佔三分一，而海外業務比重會繼續提升，不過今年最發達肯定係賣手機，公司已定咗目標今年智能手機出貨量係1,200萬部。古勝認為七月個市仍係風雨飄搖，所以會揀中興作為避風港，隻股依家股價有條小型上升軌，但因估值問題不能太貪，到30蚊附近就會有唔小壓力。

戰報

華晨汽車（01114）+12%

古晨上周四睇中隻華晨，推介時低位7.33元，至昨日高位8.23元計已累升逾12%。

百麗國際（01880）+10%

百麗持續受追捧，小尾上周二睇中時嘅低位係14.72元，至昨日高位16.28元已賺逾10%。

古勝