絲絲講場：蔡中虎「撲水」居功
中銀人壽今年首季成績斐然，做咗市場一哥，絲絲自然要向中銀人壽執行總裁蔡中虎講聲恭喜，佢話去年佢哋嘅廣告策略獲得好口碑，成績咁好可能係與打造咗鮮明嘅品牌形象有關，所以嚟緊佢哋會推出新一輯廣告。
其實去年嘅廣告背後都有段古，話說本來中銀人壽冇預到呢筆廣告嘅「筆直」，所以蔡中虎就要諗盡辦法「撲水」，例如抽起一啲客戶唔多受落嘅小禮品，慳慳埋埋先湊夠廣告費。不過話就話慳慳埋埋，其實呢個廣告都落足本o架，據聞費用達6位數字。
有信心保住一哥位
講到中銀人壽嘅好成績，又點可以唔提吓佢哋嘅人民幣保單呢？蔡中虎話今年人保佔咗佢哋約八成嘅新做保單保費，帶動首季嘅總標準保費達22.5億元，市佔率20.08%。佢又有冇信心公司全年都坐住個一哥位？佢就笑笑口話估計第二季嘅保費按年增長速度，可以拍得住第一季喎。
余絲韻