絲絲講場：「新地Xtra」雷霆談瓏璽
新地（00016）網站大搞新意思，既有新面貌，又有新內容，絲絲覺得最特別嘅係網站內新增咗「新地Xtra」欄目，畀新地中、港兩地各部門同事合力撰寫網上專欄，分享佢哋喺業務、工作及生活上嘅點滴，新地代理執行董事雷霆尋日就喺專欄內，向大家分享對樓市及瓏璽開售嘅感想。絲絲老友話，遲啲兩位郭生（副主席郭炳江及郭炳聯）都可能會透過專欄，與大家分享文章。
網站強化 同事撰文
雷霆喺專欄內話，雖然最近新做樓按利率略加，但仍處於極低水平，經濟強勁、市民收入增加、租金上升，吸引唔少用家及投資者，再者本港通脹已突破5%，今年底仲可能超過7%，所以好多人仍相信物業係最佳嘅保值方法。
佢仲話好多買家等瓏璽開售等咗好耐，相信佢哋睇完示範單位後，必定話「等待是值得的」！
除咗雷霆之外，新地代理租務總經理馮秀炎及鍾秀蓮、新地執董兼首席財務總監陳國威、天際100總經理徐綺蓮等都有喺專欄撰文。老友話如果大家鍾意，仲可以透過新增嘅分享功能，喺Facebook、微博及Twitter與朋友分享。
不僅文字溝通，新地網站亦加強咗圖片庫入面嘅物業照片，凡出售中或已落成5年內嘅物業，無論外觀、住客會所及入口大堂等圖片都搵到；此外，網站亦備有RSS頻道，用戶登記後，可透過瀏覽器嘅RSS feeder獲取新地最新資訊。
余絲韻