絲絲講場:恒生徐振文高人多計

身高6呎2吋嘅徐振文(Thomas),係恒生銀行(00011)嘅「高人」兼籃球隊中堅分子,佢喺四月初接任企業銀行業務總監,坦言企業銀行去年稅前溢利增長38%,今次上任有啲挑戰,佢承諾會努力維持高增長。

前任總監及上司過料

Thomas以往擔任商業理財業務主管,面對超過10萬個業務性質簡單嘅中小型企業客戶,依家轉戰企業銀行真係截然不同,客戶業務廣泛,當中包括紅籌及藍籌企業,貸款結構複雜兼銀碼大!喺正式接任前,前任總監吳源田以及上司陳力生過咗唔少料畀Thomas,佢自己亦透過蛇宴活動與客戶建立關係。

搞好業務 滿肚密圈

Thomas腦內已有一套搞好企業銀行業務嘅計劃,例如增加系統資源投資,盡量將工作程序自動化;另外,佢會盡快落實企業銀行銷售獎勵計劃,又會透過新近落實嘅職員交換計劃,安排中港兩地嘅同事互調工作,以後處理紅籌企業嘅業務時就可以更得心應手。

絲絲記得Thomas最初加入恒生時,正值恒生籌備九六年嘅企業形象大革新,由行徽設計、同事制服、分行裝修以至家具陳設等,都有大規模嘅改革,佢當時都有份參與推廣活動。佢其後曾經離開恒生重投外資銀行,仲喺倫敦工作及定居,期間要經常飛去非洲公幹,喺九七年中就重返恒生,咁即係話,佢由畢業以嚟只服務過兩個僱主。

佢話依家最開心係見到一啲早年新入行嘅同事,有唔少已升任區經理或其他管理職級。

余絲韻

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!