孖妹缸湖遊：QE2謝幕港股插唔落？

美國聯儲局主席伯南克上周三喺第二次議息記者會上，暗示年內加息機會微，而且又避談QE3，不過QE2喺本周四就「拜拜」喇，究竟佢想幫港股「攞景」定「贈興」？以下兩位金融界專家就為大家指點迷津，為「後QE時代」做好準備。

丁：廣發期貨副總經理丁世民

港股暫穩 8月再插

高妹： 丁Sir，之前你睇恒指今年將會低見12,000點，莫非預示QE2完結後，港股會大插？

　丁：市場一早有晒心理準備，所以港股唔會大插，不過少少波動就梗會有嘅；基金要做半年結，加上期指轉倉，恒指不但唔會大跌，反而會繼續推上去。我之前講過今年恒指將會低見12,000點，依家將低位更新為16,000點，高位就睇24,000點，七月港股走勢會好番啲，但八月又會轉差，而且我幾有信心恒指年內會跌穿20,000點。

高妹： 唔通港股會「七翻身」？不過你話八月又開始轉差，咁散戶買乜嘢股好呀？

　丁： 自從日本爆發核危機事件後，德國已經宣布停止核能計劃，仲話希望喺二○二二年全面停用核電，其實核危機係全球各國都要面對嘅問題，所以我睇好新能源及天然資源板塊，包括太陽能、風力發電、天然氣及煤等。例如近期保利協鑫（03800）股價下跌，主要係由於基金洗倉以及多晶硅價格下跌所影響，不過呢個行業板塊仍處於起步階段，需求唔會冇咗，所以未來增長潛力好大。

QE技窮 料推「OT2」

高妹： 伯南克喺上周三又噏嘢，佢除咗暗示年內唔會加息，仲粒聲都冇提過QE3，你點睇先？

　丁： 所謂「一而再，再而衰，三而竭」，QE2確實做到製造通脹預期之效，但由金融資產價格去帶動財富效應呢一步就失敗咗，因為美國樓市及失業率依然冇乜改善，所以伯南克再推出QE3嘅機會微乎其微，而經濟學家及共和黨官員一定唔會再支持QE3，但佢可能會推個「OT2」（Operation Twist），中文可譯做「第二次扭曲操作」，不過出現OT2嘅前提係先要確認美國經濟再度放緩，甚至陷入經濟衰退，而美股亦要由高位開始計算跌超過10%以上。

高妹： OT2？我咁後生點會聽過呀？麻煩丁Sir解釋吓啦！

　丁： 其實美國喺一九六一年已推出OT1，當時正值二次大戰結束，美國經濟好差，通脹又嚴重，而多種借貸利率如樓按息率均以長債孳息作為基準，於是當年聯儲局就不斷買入10年期國債，並將息率維持喺2.5厘，從而降低長期融資成本，令經濟可以再次復甦。我認為如果伯南克想保持資產價格穩定及經濟增長，加稅、減稅都唔係咁易，而且現時短債息率接近零，所以佢再次推出OT2嘅機會好大，但細節當然未有喇。

劉：渣打銀行亞洲區高級經濟師劉健恒

QE2結束未致「缺水」

祺祺：睇番資料，當年QE1結束後，MSCI亞洲（日本除外）指數及恒指一度勁插，咁你對今次QE2結束有乜睇法？

　劉： QE1推出之時，美國經濟復甦處於較初期，市場信心較弱，經濟數據亦普遍較差，但再推QE2嘅時候，經濟明顯已從谷底爬起來，美股喺去年底及今年初亦曾做好，所以兩者比較背景唔一樣。聯儲局去年底已一直話QE2喺本月會完，市場有足夠時間消化，上周三伯南克又喺議息會後聲明，話會將到期債券回饋資金再投資，所以市場唔會突然間少咗錢，排除咗短期消息影響及信心波動，不過本周四可能有人借QE2結束作藉口買賣，但從基本面嚟睇對港股影響不大。

美加息還需待明年中

祺祺：伯南克喺上周三暗示年內唔會加息，咁即係明年先加？

劉：依家美國除咗油價上升之外，工資冇上漲壓力，國民消費力又疲弱，樓市唔似香港咁勁，喺通脹來源唔多嘅情況下，美國冇理據急住加息，我預計首次加息會喺明年第三季出現。不過當美國加息，環球股市一定有反應，因為市場未揣摩到加息水平及次數，當中有好大空間去研究。

祺祺：我以為美國再推QE3會令市場出事，原來加息都會對市場影響好大。

劉： 我對美國經濟嘅睇法係短期審慎，長遠樂觀，但再推QE3嘅機會好微，除非經濟再陷入衰退。至於加息係因為美國由寬鬆財策到第一次收緊，中間過程如何處理以及會分幾多個步驟去收緊，呢啲都要慢慢向市場示意，所以一定會增加市場嘅波動性。

擬復建居屋壓樓價 35.4%人估跌逾兩成

消息指特首曾蔭權將於任內最後一份施政報告中，拍板復建居屋，並已着手物色合適地皮，你認為政府擬復建居屋嘅消息會令樓價調整幾多？據今期《東方產經》網上民調截至上周末晚上6時嘅結果顯示，有35.4%人話會跌逾20%，只有29.6%人認為冇影響。

高妹、祺祺

若有料報畀高妹同祺祺或有嘢問，可電郵money.biz@opg.com.hk