市場熱線：華新能醞釀突破

一時間好多好消息湧埋嚟，希臘有望攞到歐盟同IMF嘅「救命錢」，但最離奇係溫情總理突然喺《金融時報》寫稿，話大陸物價已經受控，並估計將穩步回落。前排阿爺話外資全方位唱衰祖國經濟，但溫總都識出口術，仲特別喺外國報紙度出聲。通脹受控真係一個大好消息，咁即係……唔使加息，調控亦可適度鬆手。不過，溫總淨用口噏，冇乜實質理據支持，六月通脹仲話「超六」。年初時夠話通脹已見頂，到年中時會回落啦！

海陸空股一齊彈

當然，領導人講嘢要信住先，而溫總嘅時機亦都好絕，絕在適逢基金要粉飾窗櫥，股民博七月翻身，期指結算前好友食尾胡，股市開始見底反彈，於是火上加油挾到班淡友夾住尾巴逃走。連祖國移動（00941）都湊熱鬧，借「哎瘋」過橋，創咗唔知幾耐以來嘅單日最大升幅。

上周五升得最勁嘅係前排跌得最多嘅股，連航運股中遠（01919）亦鹹魚翻生，海陸空全部升晒，飛機股因為油價跌所以升得大條道理，汽車股已經升咗幾日，古勝喺上個禮拜推介東風（00489）時已講過不排除阿爺會救車市，結果發改委真係上報國務院要求取消限購令，並非在下有先見之明，而係留意內地傳媒有呢個風向。

跌市時最硬淨嘅雨潤（01068），喺升市時反而捱沽，同樣道理，粵投（00270）亦跌5.4%。不過，雨潤嘅成交同沽空都相當驚人，懷疑係咪有暗病，但據講連管理層都唔知發生乜事。有人歸咎原因係中糧斥資百億養豬爭生意，但呢隻「豬」養肥要三幾年，祖國市場咁大使乜驚？古勝認為仍可趁低吸納雨潤。

呢排新股多數仆直，唔係延遲上市就係打退堂鼓，京能（00579）同中滔（01162）兩隻頂硬上，但首日孖展捧蛋，真係要祝佢哋好運。京能係做燃氣發電同風電，依家全國三大風電股都已在港上市，今個月華能新能源（00958）減價後捲土重來，喺公開發售認購不足額亦照上，首日即刻破底，但跟住幾乎日日升，卒之浮上水面，上周五收報2.54元，高招股價4仙。

貨源集中利炒作

華新能走勢同「喼神」（01910）有啲類似，散戶唔吼，大戶接貨之後慢慢炒。華新能有13個基礎投資者捧場，應該有番咁上下，講到風電，好多人都怕怕，上游的中傳動（00658）同金風（02208）有產能過剩問題，下游風電股則有上電網困難，但三大風電股股價表現又唔係咁差，當缺點已在股價反映的時候，如果國策有轉向就可否極泰來。

風電股已到汰弱留強階段，集中晒幾大風電股身上，將有利行業發展。華新能減價後十幾倍PE，同龍源（00916）及大唐新能源（01798）差唔多，新上市冇耐，貨源仍由大戶控制住，炒起來容易啲，可以博一博。

戰報

銀泰百貨（01833）+12%

詩詩上周二睇中銀泰，以當日低位11.82元計，至周五升抵13.26元高位，累計又賺逾12%。

東方表行（00398）+20%

東表上周五強勢創52周新高，古晨六月十七日推介時低位係4.92元，跟佢走番轉已賺逾兩成。

古勝