蘋果公司嘅iPhone幾時會正式與中移（00941）呢個全球最大嘅手機網絡商合作，一直係證券界及IT界嘅焦點，以下呢則消息肯定又會引嚟大家嘅猜想。有內地嘅財經記者喺自己嘅微博爆料，話親眼見到蘋果公司「教主」喬布斯嘅得力助手──蘋果公司營運總裁（COO）庫克（Tim Cook）與隨員到訪中移喺北京嘅總部。
對於庫克到訪中移呢個消息，蘋果公司當然唔會對外評論，中移暫時亦冇回應。不過據內地《第一財經日報》記者喺自己嘅微博所講，雖然佢只係拍攝到庫克嘅背影，但佢話肯定自己冇睇錯，仲話庫克有7、8名隨員同行，而中移嘅大堂亦掛上中、美兩國嘅國旗，明顯係歡迎庫克呢位貴賓到訪，佢亦估計庫克到訪係為咗iPhone嘅合作。
其實兩家人為咗iPhone嘅合作磋商已傾咗3年，其中一大難題係蘋果公司仍然唔願意為中移生產TD3G嘅iPhone，不過中移董事長王建宙早前表明，喺蘋果公司將支援中移力推嘅TD-LTE4G標準背景下，中移參與iPhone銷售相信亦為時不遠！
余絲韻