酒量麻麻要諗計
喺內地工作，首要當然係練好普通話，Simon話已經加緊操練，特別係將港式用語轉番白話文，例如「彈性」改為「靈活性」等，佢喺上周出席長沙分行開幕時，更一次過用普通話致詞，相信普通話對佢嚟講冇乜難度。不過亦有樣嘢難倒Simon，就係內地食飯應酬好鍾意飲酒助興，自言酒量非常一般嘅佢，都要諗計應對。
近排Simon相信會好唔得閒，因為唔少同事朋友都排住隊同佢餞行，佢話之前就與金管局副總裁阮國恒食飯敍舊，又去咗上海、北京與當地嘅監管機構「打招呼」。絲絲覺得香港與上海其實好近，Simon亦計劃每月回港一次，相信大家仲有大把機會見到佢。
余絲韻