今年賣樓賣得非常好嘅恒大地產（03333）一直以「豪氣」見稱，本周末佢哋會為旗下喺廣東清遠嘅旅遊綜合項目──恒大世紀旅遊城舉行開幕典禮，淨係睇佢哋邀請嘅人物，就可以用「多、紅、勁」呢3個字嚟形容。
絲絲聽老友講，話今次呢個典禮除咗邀請星級人物之外，恒大仲請咗全國300幾間媒體嘅記者去採訪，與老闆許家印見吓面，大家唔好以為許生係咁易應酬大家，查實佢預留咗3粒鐘時間與大家溝通，似足馬拉松式會面！
恒大喺清遠呢個項目，係華南區最大型旅遊綜合項目，入面會有皇家園林、有300多間房嘅酒店、飲食中心、娛樂中心、運動中心及足球基地，開幕典禮當日除咗由許生講吓生意經，佢哋仲請咗好多藝壇紅星兼體育明星到場，真係閃到爆。
獲邀出席嘅娛樂明星及歌星包括有容祖兒、趙本山、范冰冰及Twins，許生一向好支持體育運動，所以到時亦會見到恒大女排嘅郎平、奧運會網球雙打冠軍孫甜甜、羽毛球世界冠軍謝杏芳、乒乓球雙打冠軍郭躍等體育明星，陣容認真強勁，同場仲有美食及健康養生嘅介紹添！
余絲韻