市場熱線：潤泥現價唔怕買

地主股又係最快腳軟，但講到最樣衰藍籌非思捷（00330）莫屬，市值得番300億左右。原本利豐（00494）同佢有得揮，但呢兩日拿拿臨回升，原來尋日朝早9點搞咗個「投資者日」同分析員講公司大計，仲搞埋網上直播以免「大細超」；公司喺上周五已出通告預告呢個節目，但留意嘅人唔多，尋日朝古勝見利豐開市前時段已升咗6%，兼且開緊市邊會得閒睇直播？

零售股租金壓力增

到中午公司出新聞稿宣布5單收購，利豐下晝升到最高16.4元，但跟住一路派貨，收報15.58元。雖然利豐今次搞到透明度好似幾高，但在下仍係覺得散戶老蝕，總之喺開市時間出呢啲股價敏感消息，自然有人佔咗資訊上優勢。

兩隻零售股漢登（00448）同埋JOYCE（00647）亦偷步炒業績，但古勝對零售股有保留，成績表係反映舊年，舊年好唔代表今年好，今年舖租狂加，賣衫股未必有咁好景。雖然古勝暫時未睇到漢登成績表，但公司主要孖屐喺台灣同南韓，受舖租影響會較細。

中信泰富（00267）條東隧加價不成，股價繼續尋底，但主要係受澳洲狂加資源稅打擊，同係受資源稅影響嘅股包括中信資源（01205）同五礦資源（01208），前者早已跌穿供股價，但有阿媽包底冇有怕。

內房股相當硬淨，尤其恒大地產（03333）升逾6%，不過古勝好懷疑啲細內房股起樓有冇錢賺，依家利息貴、建築材料貴、人工貴，舊年細內房股發債集資已經要畀十幾厘息，今年據聞要廿幾厘，仲邊有肉食？不過，建材股就唔理你咁多，中建材（03323）再升7%。

建保障房帶動需求

水泥股咁勁主要係憧憬水泥價格向好，而催化劑又係保障房，今年計劃要起1,000萬套保障房，但上半年開工得三成，搞到阿爺大為震怒，落柯打最遲第三季要開工，水泥股聞風先動。不過，炒水泥股亦要睇地區，因為每個地區嘅水泥價都唔同，尋日升得最勁嘅中建材同山水（00691）就分別以東部同東北為基地，而金隅（02009）則受北京水泥價跌所影響而跑輸大市。

華潤水泥（01313）主要喺華南地區經營，需求同價格都好穩定。潤泥亦係香港最大水泥供應商，香港樓市同基建咁蓬勃它都貢獻不少。潤泥股價冇其他水泥股咁樣大上大落亦係呢個原因，公司今年預測PE約14倍，估值相當合理，如果相信水泥價格會繼續向上嘅話，潤泥會仲有上升空間。

戰報

JOYCE（00647）+11%

小尾上周三睇中隻JOYCE，果然夠眼光，尋日搶高至1.01元，以當日低位0.91元計，已賺近11%。

哈爾濱動力（01133）+11%

古勝上周一推介嘅哈爾濱動力繼續有反彈，當日低位只係7.96元，尋日高見8.85元，累計最多11%。

古勝