絲絲講場：致富老闆派定心丸
嘩！邊個咁衰周圍發放假消息呀？絲絲收到風，市場上有人亂咁唱話致富集團出現資金周轉問題，搞到致富有好多客戶騰騰震，除咗有人打電話去致富要搞清楚事件，仲有啲人話要即刻拎錢閃人喎！
「客戶資產100%安全」
不過，致富集團主席周松堦就拍晒心口咁話：「公司一啲資金問題都冇，客戶嘅資產係百分之百安全，係有啲人亂咁講嘢中傷我哋，依家我哋已經報咗警，警方會查得一清二楚，所以客戶唔使擔心。」
致富去年不斷擴充分行數目，剛啱又搵咗中國人民大學風險投資研究中心主任劉曼虹教授加盟，以協助公司業務發展，佢哋有咁多新搞作，絲絲就唔信佢哋會有問題嘞，大家放心喇！
余絲韻