港股係咁跌，絲絲悶悶哋約咗個靚仔「芬佬」食飯，佢話踏入六月就係咁幫佢個仔（管理嘅基金）「減肥」（沽貨），呢兩日更加翹埋手唔做嘢，絲絲問佢點解咁醒，係咪因為QE2就快完？點知佢答：「月食吖嘛！」絲絲當堂啞咗。
大家都知香港睇到月全食，靚仔「芬佬」發咗個電郵畀絲絲，入面係哥本哈根商業學院嘅Gabriele Lepori教授早年嘅一份研究報告，結論竟然係「日食、月食會造成股市恐慌！」就連《經濟學人》都曾經報道過。
Lepori教授搜集咗一九二八至二○○八年，共362次日食、月食嘅日期及時間，對比美國四大指數，發現喺日食、月食嘅前後3日之內，其中3個指數嘅回報率都低於平均數，如果日食、月食發生喺股市交易當日，效果就更明顯，而且「食」嘅幅度愈大，影響亦愈大，個市喺日食、月食結束後幾日就會反彈，反映市場會出現唔理性。
靚仔「芬佬」話，佢明白呢個現象唔一定準，但就可以作為參考，橫掂只係幾日唔做買賣啫。佢仲話其實好多「芬佬」都好迷信，有洋人「芬佬」會求助占卜或塔羅牌，華人「芬佬」就好信紫微斗數。絲絲都識得個「芬佬」朋友，每年春節都會搵大師批吓全年運程，費用過100萬元架！
余絲韻