金融海嘯結束至今只有兩年多時間，但通脹就好似十幾米嘅巨浪咁湧埋嚟。北大教授兼人民銀行貨幣政策委員會委員周其仁尋日喺青島出席一個論壇時，就講到通脹係貨幣現象，用管物價嚟抗通脹「你點都擋唔住o架」！
周其仁話，如果只係個別加價就容易管啫，如果一個一個咁加價，你都好難管得住嘞。就算拉人去坐監都唔掂，因為立法限制加價，個個都要拉，到最後就連監獄都話要加價！
中國喺一九七九、一九八八及一九九三年，出現咗3個好典型嘅高通脹年份，當時惟有請外援，呢位外援好超班，佢就係諾貝爾經濟學獎得主佛利民。周其仁話佢當時講通脹就係一種貨幣現象，貨幣如果供應偏高，你一定管唔住啲物價，所以佛利民嘅理論同中國嘅經驗非常一致。
余絲韻