咁啱喺上次超人見記者時，講緊第三跑道應該全力起飛，機管局張總即刻主動出擊，為第三跑道作公開諮詢方案。
從談判角度來講，政府今次比以前進步，先話畀你聽，依家我哋已經畀人追過，唔搞就死梗。要搞擴建或者第三條，又話擴建唔捱得好耐。其實即係話選擇有三個，不過有兩個就唔得嘅，惟有選擇第三個，即民主得來又有「引導性意向」選擇。講真天價一定唔在講，但諗深一層香港嘅港口地位已經畀深圳鹽田港、蛇口等迎頭趕上，如果國際航空樞紐都冇埋仲有得剩？
再睇吓首爾、吉隆坡，全世界都要為加跑道而喝采，深圳由一條跑道增至三條，北京就第四條，上海又話第四條……正所謂Eason嘅舊歌《十面埋伏》，香港，你嘅優勢又如何？
就算政府意識到要搞，面對嘅問題仍然唔少，例如環保朋友，中華白海豚又會「無聲抗議」，仲有政客朋友等等……愈遲開波成本愈加劇，真係有排煩。講真高鐵唔係為咗我哋呢一代，係為下一代喺香港呢個地方嘅朋友製造一個叫做「經濟接點位」，「接點不在港，人去獨愁傷」，你唔搞內地嘅安答同盟爭住做，死未？不如大家放下成見，積極為香港打打氣，再創獅子山下的光輝歲月咪仲好。
香港大學電子金融服務榮譽助理教授 徐燦傑