孖妹缸湖遊：陳惠仁：呢個世界冇「股神」

陳：Chartwell Capital創辦人兼投資總監陳惠仁

陳惠仁○二年喺紐約大學金融及會計學系畢業後，就喺美國創立咗一間合夥公司，做股票分析及投資業務，後來佢覺得自己嘅投資理念與巴菲特好相近，於是喺○三年開始每年都參加巴郡周年大會，首次進入「股神」嘅投資國度，直至○八年更自告奮勇向巴菲特提出訪問巴郡管理層嘅願望，搞咗一輪，最後獲巴菲特送上一句：「我沒有反對的理由！」於是造就咗《Lessons from Warren Buffett's Top Business Leaders》呢本書嘅誕生，香港版係《尋找巴菲特的商業兵團──學習營商及人生之道》。

巴菲特都只係一個人

高妹： 你見過巴菲特已經好勁，估唔到你說服埋佢畀你訪問巴郡公司嘅9位管理層，你覺得點解佢哋會咁叻？

陳 ：因為佢哋嘅做人宗旨係堅守原則，中國有句成語叫「一言九鼎」，即係我哋所講嘅「牙齒當金使」，講得出做得到，咁樣先可以嚴守投資紀律。講到底，成功嘅投資者係建基於佢嘅做人態度，點樣喺股市中做到人棄我取，喺大升市、大跌市時做出正確決定，呢啲都需要依賴人生成長經歷，所以訪問佢哋唔係去學習投資之道，而係學習待人處世之道。

祺祺：你喺○三年開始參加巴郡周年大會，見過「股神」咁多次，你覺得佢為人係點樣？

陳 ：呢個世界邊度有「股神」呀！巴菲特根本就係一個人，只不過佢有思考邏輯，相信自己嘅投資決定；而冇邏輯嘅人因為冇個人諗法，所以只會識得相信人哋。舉個例，早前美國科網股Linkedin上市，業績都未有，一蚊都未賺過，股價就炒咗上去，其實作為投資者應該諗吓呢條數點計至啱，以投資角度去分析呢間公司嘅發展前景、20年後仲會唔會存在等問題，而唔係作投機性短炒。　

聽冧巴後要獨立分析

高妹：不過香港散戶鍾意短炒之餘，亦好鍾意聽股評人畀冧巴喎！

陳 ：我認為所有股市都一樣，香港有好多散戶，美國都有，只係可能佢哋嘅知識水平會高啲，但投資上嘅羊群心態全無分別，同樣希望聽市場消息賺快錢。所以我唔覺得香港係另類嘅投資市場，反而因為地方太細，卻擁有國際金融體制及中心地位，先係佢值得可取嘅地方。講真吖，喺《CNBC》、《Bloomberg》一樣有「財經演員」每日推介股票冧巴啦！

祺祺：散戶愛聽「財經演員」推介冧巴，咁你自己會唔會聽埋一份？

陳 ：聽冧巴唔係錯事，基金經理坐埋一齊食飯都會講句：「大家最近睇緊乜呀？」呢種係投資上嘅意見交流，唔代表你聽咗就要去買賣，而係應該再做分析。但我覺得成日講股票嘅人，唔會有好多時間去研究股票，當佢哋唔識呢隻股，咪睇住個走勢圖去講囉！如果你追開NBA，東岸西岸加埋有成幾十隊波，你識晒啲籃球球員名有幾出奇？散戶識晒1,000隻股票嘅名根本冇乜難度！但除咗記得個名，最緊要係有獨立分析。

唔好一本通書讀到老

高妹：我知你都係堅信價值投資法則，不如分享吓你嘅揀股大法啦。

陳 ：好多人揀股票成日講PE（市盈率），係有用但唔係永遠都Work，例如大家成日用PE去睇銀行股，其實睇PB（市帳率）會有用啲；又好似地產股咁，因為唔係做零售，所以睇PE冇乜用，反而要睇NAV（資產淨值）。總之大家唔好一本通書讀到老，唔好一見到隻股票PE夠平就衝去買貨，要視乎唔同嘅經濟環境、唔同嘅行業去選擇適合嘅投資研究方法及工具。

祺祺：你又講得有道理喎！我哋真係成日都講PE，仲以為自己好醒添！

陳 ：我覺得PE就好似一塊膠紙，可以隨身攜帶，任何場合都用得着，但黏貼力就唔係好穩陣囉。其實要證明一間公司係好嘅，最低限度係你可以用三言兩語，總結到呢間公司係做乜嘢業務。

高妹： 不過散戶能力有限，冇你哋收到咁多料喎。

陳 ：我主力買賣美股及港股，但都係睇年報為主，好少去見公司管理層，如果你學過金融及會計，去研究一啲公司例如係星巴克（SBUX）、中國移動（00941），睇年報內嘅數據已經做到基本分析，因為散戶都能夠直接接觸到佢哋嘅生意，但分析嘅深度就要用時間去累積經驗。另外，我都好鍾意睇年報內CEO（行政總裁）或Chairman（主席）嘅致辭，從中可睇到佢哋嘅人品，點解人人都要睇巴菲特嘅報告？因為真係佢自己寫，每年內容唔同之餘，仲要有十幾頁紙囉！

贏錢永遠當自己好運

祺祺：老土啲問句，你有乜嘢投資心得？

陳 ：贏錢永遠都當自己好運，而唔係因為你嘅投資功力好勁。記住「老鼠飲河」呢4個字，河水咁多，老鼠個嘴咁細，飲少少都飽喇，勉強去狂飲，最後咪脹爆肚而死囉！貪心永遠都係失敗嘅開始。相反專注一個地區或者一個股票板塊，然後深入研究，分分鐘投資回報仲理想。

58%散戶擬認購iBond

市傳有關通脹掛鈎債券（iBond）嘅前期工作正式展開，預料iBond將於七月推出，息率與近6個月的本地通脹掛鈎，你有興趣認購嗎？據今期《東方產經》網上民調截至昨晚上6時嘅結果顯示，58.2%散戶話有興趣，其餘41.8%人就話冇興趣。

高妹、祺祺

若有料報畀高妹同祺祺或有嘢問，可電郵money.biz@opg.com.hk