市場熱線：光國食正環保國策

美國失業率回升到9.1%，舊年爭論QE2前夕嘅經濟數據又係突然轉差，唔多唔少都有陰謀論，搞到QE3陰魂不散。美股連跌五個禮拜，聽落好似好慘情，但標普同高位比較實質跌幅只係半成。QE3肯定係六月嘅不明朗因素，但再玩落去將會令美金信心崩潰。

部分新股招不逢時

上周五恒指再跌超過300點，國指跌226點，內銀股繼續腳軟，但最差係煤炭股，話阿爺今次會睇實煤價唔好亂來。阿爺話唔准電煤加價已講咗幾次，次次煤股都係先跌後升，但點解今次煤股跌得特別犀利呢？煤股不濟，電力股應該威番次，但上周五亦隨大市下跌。

個市一回調，好多新股都要打退堂鼓或延遲上市，新秀麗（01910）同「趴打」要頂硬上，但咁高PE招股，真係戥佢哋驚。

瑞金（00246）仲未復牌，但民企盤數得人驚，喺美國上市嘅民企連環畀人篤爆，綠森集團（00094）大股東嘉漢林業股價狂瀉，綠森亦拉埋閘。林業股經常出事，中國森林（00930）唔使多講，如果生長喺地上嘅林木都可以造假，咁樣喺地下嘅礦產咪更加牙煙？

深圳突然唔准電動自行車行駛，其實舊年阿爺已經想整頓電動自行車，後來收回成命，呢排又經常傳出限制嘅消息。香港有兩間上市公司造電動自行車鉛酸電池，天能動力（00819）同超威（00951）呢排冇乜異樣，但鉛酸電池對環境污染，勢將被逐步取代。

垃圾發電極具規模

講開環保，心水股始終離不開光大國際（00257），前兩年開始搞垃圾焚燒發電，結果食正「十二五」規劃。國務院強調要全力鼓勵垃圾焚燒發電，同時可解決垃圾同電力問題，可謂一舉兩得。不過，垃圾焚燒發電可能會產生二噁英，所以附近居民嘅反對聲音唔小，但有人參觀過光國喺江蘇嘅垃圾焚燒站，話有噴泉假山鳥語花香咁誇張。

江蘇嘅垃圾焚燒發電項目係全國最大，並採用自行研發嘅爐排及自控系統，設備成本大幅降低，佢嘅爐排比入口貨平四成，未來仲會推出自己品牌。光國依家嘅往績PE低過20倍，每年都有唔少新項目落成去保持增長，今年就有15個新項目投入營運，以未來兩成嘅複式增長來講唔算貴，阿媽前排仲以每股3.5元樓上增持，係一隻值得長線投資嘅股票。

戰報

銀泰百貨（01833）+10%

銀泰上周五再創52周新高，古晨於五月二十四日推介，跟佢於低位12.86元上車，最多賺逾一成。

東方表行（00398）+17%

東表上周五全日高位見5.2元，帥哥五月二十三日推介時低位只係4.44元，上車走番轉已賺逾17%。

古勝