港交所（00388）增設期指夜市嘅提議，與港股加時一樣，惹來市場唔少爭議，港交所特別設立咗一條電話熱線，為經紀解答關於期指夜市嘅所有問題，如有需要，更可安排與經紀進行會面。
港交所過去發表嘅諮詢文件都唔少，但喺諮詢期間設立Hotline解答經紀問題，印象中就比較少見。睇嚟今次建議真係引起市場極大回響，港交所唔敢掉以輕心，盡可能及盡早解答經紀心中一切疑問。
之前亦反對港股加時嘅證券及期貨專業總會會長王國安，聽到期指要搞夜市就頗為激動，佢表明會反對，話好擔心大市會被大戶舞高弄低，變得更投機及更波動。佢仲好肉緊咁話，全世界都收緊金融監管，偏偏香港就一味「放」，畀海外對沖基金等「大鱷」入嚟，「人哋嚟到香港，就梗係嚟搵食，唔通嚟畀錢我哋使咩！」
立法會議員詹培忠亦話，期指一向以大戶為主，散戶較少參與，若開埋晚市，相信會更集中於大行，可能會對散戶造成不公，市況由大戶操縱，因此認為港交所要小心處理。
余絲韻