絲絲講場：四叔增持恒地計晒數
恒地（00012）主席李兆基（四叔）增持股份冇停手，佢全憑一個信念，就係「抵買」！佢唔係隨口嗡，原來佢心中有把「尺」，量好晒恒地點解咁抵買。
舊樓重建條數襟計
四叔好細心咁以佢自己嘅方式為恒地「估值」，佢話恒地所持煤氣（00003）嘅價值已經有500億元，恒地本身租務組合計及租金回報，又值過千億元，當中仲未計集團所持嘅新界農地，以及舊樓重建項目嘅潛在價值，仲話如果恒地喺港九市區數以十計嘅舊樓重建項目都順利落實，當中隨時可提供300萬呎嘅可建樓面，如果呎價平均可以做到萬五至兩萬蚊一呎，隨時又值多400億至600億元，所以實在係好有價值嘅投資，並笑言自己有銀紙就會再買多啲恒地股份！
認購新股利潤唔多
四叔投資一向咁精明，近期佢積極增持恒地，當然係心裏有數啦，不過恒地副主席林高演其後都補充話，四叔嘅所披露嘅「估值」，最多只可以視為佢嘅個人見解，公司嘅實際估值一定要參考年報及專業人士嘅評估！
近排有咁多新股，但唔見四叔嘅足迹，四叔話認購新股利潤唔多，「大隻嘅只係分得少少、細隻嘅就分鬼咁多（指分配比例），為免傷腦筋，寧願將啲錢增持恒地好過！」
余絲韻