證監會行政總裁韋奕禮喺下周三（本月八日）就Last day，佢已經約咗一大班傳媒喺當日談心，講吓佢嚟咗香港6年嘅感受。依家大家最關心嘅係下周三或之前，政府會唔會公布證監會CEO繼任人呢？
絲絲聽聞，政府未必會喺韋奕禮離任前就公布新CEO人選，但冇理由一個咁重要嘅監管機構會出現阿頭真空o架？所以估計當日會公布署理CEO嘅人選安排。咁邊個會做署理CEO？論資排輩，以副行政總裁張灼華嘅機會最高。
咁係咪代表張灼華已無緣問鼎CEO？咁就真係要考吓大家IQ，不過近日市場傳聞下任CEO人選以「老外」佔上風，一時有傳澳洲人係大熱，一時又話係歐洲人。
政府暫未公布CEO繼任人，未必代表仍未搵到合適人選，有消息話其實遴選委員會搵繼任人好順利，依家已進入程序階段。大家都知做得證監會高層，肯定要通過品格審查，俗稱「查三代」，梗係需要一啲時間，再者人家可能本身有工作，都要有安排架，大家都係耐心等公布啦。
余絲韻