絲絲講場：中資證券業協會四周年酒會金牛賀喜
近年中資證券業迅速冒起，生意愈做愈大，尋日係中資證券業協會四周年紀念兼新任會長閻峰就職，佢哋搞咗個大型酒會，現場放咗隻「金牛」，當然係寓意股市牛氣沖天，恒生指數快啲大升。協會嘅人力物力都咁充裕，真係非常配合近年不斷「升呢」嘅中資證券業！
黃色衣飾顯示團結
絲絲見多名嘉賓喺金牛身上簽名留念，絲絲都摸吓金牛添旺氣，雖然隻「金牛」係用塑膠製造，不過最緊要係好意頭，佢嘅分量及Size十足，資深經紀張華峰就笑言，呢隻金牛之後應放喺邊度好呢？
中資證券業協會亦邀請多名樂師喺現場打鼓，增加氣氛。新任會長閻峰仲非常有心思，專登搵人為會員設計會呔，男士們個個打上鮮黃色會呔，女士們亦未受忽略，在場所見，每名替協會工作嘅女士都戴上黃色絲巾，非常搶眼，顯示中資證券業嘅團結。
除咗好多中資證券行老闆出席之外，立法會議員詹培忠、港交所（00388）行政總裁李小加、行政會議成員史美倫、商交所主席張震遠、財庫局局長陳家強等香港金融界代表性人物當然亦有畀面到賀啦！
余絲韻