市場熱線：博士蛙上升空間大

老美周二晚咁多壞數據都升百幾點，周三晚一個私人企業職位增長未如預期就跌咁大鑊？股票升跌從來都係大戶話事，亦預咗六月會大上大落，但呢排真係好難估。近期嘅經濟數據差到無倫，咁啱係今個月QE2到期前出現，大半年前經濟數據又係突然轉差，失業率去到9.8%，所以催生出QE2，跟住經濟數據即時大幅改善，唔通今次美國佬又想故技重施，搵藉口推出QE3乎？

領匯跌市下創新高

港股似乎冇理老美玩嘢，走勢跑贏美股，但亦唔好太老定，瞓身都等下半年之後。尋日有唔少二三線股逆市做好，集體上升板塊係燃氣股，原因係胡主席去俄羅斯搞掂咗個天然氣協議，燃氣股條氣順晒。領匯（00823）前日跌完即反彈，並創下新高。中國金石（01380）有花旗唱好，大成生化（00809）發盈喜，都係較標青股份。

下跌股方面，保利協鑫（03800）大跌7.57%，多晶硅價格三個禮拜內勁跌30%，現價相信已跌穿每公斤55美元，細公司可能要蝕本，但協鑫生產成本係全城最平，每公斤只約21美元，惟利潤亦會受影響。做股民真係唔容易，上個禮拜仲話德國要大力發展新能源去填補核能缺口，但原來多晶硅價格散咗都唔知。

孖屐透明度最高嘅係零售股同資源股，至於科技股就好多人都耍手擰頭，喺科技大學搞科技嘅幻音數碼（08248）今日會轉主板上市，新老冧係「十八廿二」，公司近期推出兩款新產品，其中一樣係用佢嘅機頂盒可以喺電視「玩」電腦，因為連滑鼠都可用埋；另一樣產品係可接駁機頂盒，出街用手機或iPad都可睇波或電視節目。呢兩樣新產品如果成功，呢間市值得2.6億元嘅公司值得留意。

祖國童裝市場龐大

前排有好多公司跌到超賣，好似「田雞」博士（01698）由近6蚊跌到近4蚊，但周一出咗粒十字星之後，連續3支陽燭上到4.81元。隻「田雞」上市時相當巴閉，但跟住大股東押股嚇親街坊，三月尾派成績表賺多1倍有段中興日子，然後又再尋底，公司往績PE 26倍，今年會回落到20倍樓下，抵唔抵買係睇前景，管理層話今年零售面積會增加超過50%，即係零售網店會達2,000間以上，大部分係百貨店專櫃，而自營店佔咗唔少，睇店舖增長幅度雖然大，但仍然仲有好大空間。

祖國14歲以下人口有2.2億人，差唔多有成個美國咁大，一孩政策集萬千寵愛於一身，所以呢2億人係冇收入嘅中產，前日六一兒童節生意滔滔。「田雞」嘅增長潛力唔使懷疑，個反彈浪應該未完，花旗首予評級為買進，目標價6.5元。

戰報

時富金融（00510）+11%

古晨尋日推介嘅時富金融果然有料到，即日炒上0.52元高位，於低位0.47元走番轉，賺近11%。

德金資源（01163）+12%

詩詩於十九日睇中嘅德金資源表現硬淨，尋日高位0.275元，以推介日低位0.245元計，升逾12%。

古勝