近年致富集團嘅發展愈嚟愈進取，去年更喺多個地區設立證券分行，依家旗下嘅分行數目多達19家，不過集團主席周松堦嘅行事作風向來低調，好少接受訪問，前日絲絲與周氏伉儷及致富高層一齊食晏，周老闆講咗一個小故事，令絲絲更加欣賞呢位咁低調嘅證券行老闆。
周老闆話：「有次我與太太返廣州玩，去咗一間酒店飲咖啡，嗰度有個人表演唱歌，起初佢唱得冇厘神氣，又冇客人理佢，於是佢唱完後，我就第一個拍掌，然後其他客人就跟住我一齊拍掌。佢唱第二首歌時即刻成個人醒晒，後來我為咗鼓勵佢，就畀咗啲小費，點知其他客人又跟住我畀錢！」
周老闆解釋話，呢件事證明咗只要你用心做嘢，對別人多啲鼓勵，少啲批評，其他人自然會睇到你嘅付出，然後跟住你去做，做人、做生意及做投資都係一樣道理。絲絲覺得佢真係智慧型老闆，難怪生意可以愈做愈大啦。
（余絲韻）