絲絲嘅基金界老友早幾日去咗瑞豐石化（08096）喺佛山嘅新廠房參觀，返到香港後，老友話見到佢偶像譚詠麟喺瑞豐嘅晚會上唱歌，真係喜出望外，當晚除咗有多位藝人出席之外，港交所（00388）前行政總裁周文耀亦有到場，瑞豐主席余允抗及執董余維強認真有面子。
余允抗以前做過電影導演，與演藝界交情不淺，所以請得郁「譚校長」，據聞譚校長以前好少出呢類Show，今次好抵得諗，據講只收友情價。老友話最鍾意嗰晚佢唱嘅《一分鐘最愛》，唱慢歌都幾乎唱爆喇叭，功力認真深厚。其他同場藝人仲有關楚耀、周麗淇及馬浚偉，司儀陣容亦好強，有曾志偉及安德尊。
據老友報料，晚會有千幾人參加，當中有60人係基金經理及證券界代表，瑞豐請嘅客戶有近千人，場面真係非常熱鬧。當晚最High嗰個應該係周文耀，佢坐主家席，見到譚校長出場唱歌，即刻攞部iPhone出嚟影相。
老友仲話，余維強係證券界老行尊，與周文耀老友鬼鬼，既然老友叫到捧場，周文耀梗係唔會托老友手o架啦。
（余絲韻）