創業板公司漢華專業服務（08193）尋日上市，絲絲專登去捧老友歐陽長恩嘅場，事關佢辭任證監會執行董事及營運總監後，絲絲都好耐冇見佢，點知好奇怪咁撞到保華集團（00498）副主席劉高原（Tom），佢話自己係漢華嘅股東嚟o架。
絲絲翻查漢華嘅招股書，都唔見阿Tom個名，佢笑笑口話依家好享受做證券投資，拎舊錢玩吓新股，今次入股漢華，就係用佢喺○九年私人買入嘅殼股嘉進投資（00310）做股東，買入咗漢華兩成股份，睇番尋日漢華嘅升幅，呢兩成股份帳面就賺咗1,100萬元，但對阿Tom嚟講應該係濕濕碎。
尋日見阿Tom揸住部iPad滿場飛，周圍講解iPad嘅好處，並展示部機桌面上與太太、囝囝嘅家庭照，絲絲真係以為佢去咗蘋果公司度做，佢就話好後悔當年冇買蘋果公司嘅股票喎。
（余絲韻）