唔少上市公司成日都話想「去家族化」，不過總會有例外，一向家族管理色彩都已經極為鮮明嘅內地發展商碧桂園（02007），尋日就宣布即日委任老闆楊國強嘅三女、今年只有23歲嘅楊子瑩做執行董事。
楊子瑩依家主要負責公司嘅財務，包括境外及境內融資，前途好唔在講，絲絲一睇通告，得知楊小姐嘅基本年薪已有130萬元人民幣，仲有其他附加福利以及年終管理花紅，「錢」途都唔錯噃！
與剛啱登上胡潤《少壯派富豪榜》第二位嘅姐姐楊惠妍一樣，楊子瑩亦喺美國俄亥俄州立大學畢業，不過佢就主修心理學。與唔少富二代一樣，佢喺加入碧桂園之前，亦曾經喺一家著名嘅國際投資銀行工作，喺○八年先加入碧桂園做主席助理，年紀輕輕就已獲委以重任，依家做埋執董，就可知楊國強幾咁落力栽培佢啦。
楊國強嘅家族觀念有幾重？睇番碧桂園去年嘅年報，加埋楊子瑩之後，公司共有10名執董，當中有5人係「楊家將」，除咗楊國強、楊惠妍及楊子瑩外，仲有楊子瑩嘅堂兄楊志成及楊永潮。
（余絲韻）