市場熱線：大光燈再展升浪

至於祖國魚缸亦結束8連跌，跌咗咁多終須一升，中石油（00857）阿媽增持A股，又傳匯金增持內銀股，出咁多法寶先至止跌，今日祖國會公布PMI，古勝認為唔會咁快加RRR住，呢排出現嚴重缺水症，話RRR冇上限係呃細路哥。

成交突然咁多總有焦點，和黃（00013）諗住分拆赫斯基，升咗5%、成交接近40億元，內銀成交亦激增；另外，MSCI收市後更換組合，8隻新貴總成交達60億元，但新貴得隻銀泰（01833）標青。

煤股藉加電費發圍

德國宣布喺二○二二年開始全部唔用核電，唔使問會益咗太陽能同風電，新能源股又再炒過。至於祖國話即將公布核電安全報告，古勝寫包單個報告話冇問題，但德國咁決絕，會唔會對內地核電發展構成壓力就唔敢講。

統一企業（00220）嘅飲品都驗出塑化劑，但尋日股價仍然硬淨，尾市竟然爆升11.5%，真係估佢唔到。依家乜都唔食得，日本同台灣食品變高危，祖國食品更加得人驚，歐洲亦不時有食物出事，就連食品股都變高危，雨潤（01068）小小事都被當大新聞，搞到呢幾日股價都逆市下跌。工業用電加價，電力股尋日亦做好，但花旗出報告話最得益係電網，電廠只係小着數，而據地區分布，中國電力（02380）最有景。電費加價，煤股亦乘機發難，兗煤（01171）同神華（01088）都創52周新高。

I.T（00999）派完成績表勁升，謝瑞麟（00417）則狂瀉，連帶金飾股亦出現回吐。三大工業股齊齊喺尋日派成績表，唔通係好日子？德昌（00179）賺多1.4倍，偉易達（00303）賺少2%，但已經好過預期。

壯大資產管理規模

內銀股做咗火車頭，講到PE同PB真係平到嘔，下半年阿爺有機會放鬆銀根，所以升得算有道理，光大銀行亦計劃下月來港上市，以內銀掛牌嘅往績，應該有睇頭。喺未上市前不如先睇吓大光燈（00165），雖然揸住嘅光銀股權已大幅攤薄，但話晒血脈相連，近期走勢落後大市，值博率都幾高。

大光燈早輪以8.9億賣咗光證國際51%權益，光銀同光證兩個仔都已自立門戶，故大光燈要搵番其他新業務經營，而老本行離不開金融，呢排祖國資金鏈斷裂，集團做資本性投資同融資呢兩樣最得益，另房地產基 金同資產管理亦會發大來做。

大光燈計劃三年內將資產管理規模擴大3倍到500億元，目標係QDII同QFII，即係中港兩邊炒，另外亦計劃做埋保障房資金管理，睇前景應該唔錯。

戰報

兗州煤業（01171）+11%

兗煤尋日創52周新高32.95元，帥哥上周四已吼實，於當日低位29.65元上車，最多賺逾11%。

合動能源（00578）+11%

詩詩上周一睇中嘅合動受追捧，尋日高位0.79元，以推介日低位0.71元計，跟到足可賺逾11%。

古勝