近排仍然係忙到冇停手，但本住敬業樂業嘅精神，間中都冇辦法唔打聽一下液化氣（LPG）業務嘅情況；依家全世界都講緊環保、能源，對於賣能源嘅股份，有時都真係要打醒十二分精神。尤其祖國嘅能源股，如果配套優良，就更加係冇得頂。
新海能源（00342）近年都真係密鑼緊鼓，又配股又收購，不斷有大動作。去年新海能源又用6,000萬元人民幣收購聯新能源，整合埋汽車加氣業務。唔好睇輕呢樣嘢，聯新能源佔廣州汽車加氣業務60%市佔率，呢一步棋簡直係「促銷催化劑」，令新海能源有個窗口賣走晒堆LPG，隨時令佢呢幾年LPG銷售量增長步伐快到你唔信。
收購聯新能源之後，新海可以好容易將加氣業務延伸至廣東省內其他城市。同時間，新海喺另一邊已經申請緊香港氣體註冊公司牌照，諗住喺本港經營LPG銷售業務，以10%市佔率為初步目標起步走；香港平均LPG零售價為內地3倍，毛利率較高，如果比佢打得入真係唔係講笑。同時間佢亦都計劃緊染指澳門LPG銷售業務，簡直係「發展之狼」。
「十二五」規劃下，國家鼓勵發展嘅產業受惠於國策，無敵之相。打住環保旗號，經營液化氣業務的新海，近年股價靚仔到冇得再靚仔，後續動作值得憧憬。收購聯新之後，又可以借聯新嘅技術再染指四方，隨時畀佢打出一片大江山。繼續追蹤，出發。
香港大學電子金融服務榮譽助理教授 徐燦傑
（作者為註冊持牌人士）