絲絲認識唔少內地企業嘅駐港員工，大多都話香港人煙稠密，好有壓迫感，不過當然亦有唔少人愛上香港，通天酒業（00389）副總裁李恝（Leo）鍾意香港嘅原因好簡單，就係食得「放心」。
由通天酒業喺香港掛牌當日起，Leo就喺香港落戶，佢話喺香港生活好開心兼「放心」，事關佢話內地黑心食品無日無之，牛奶內有三聚氰氨，打邊爐有化工合成嘅一滴香，豬肉又有瘦肉精……喺內地與屋企人出街食飯成日都要步步為營，左揀右諗，要想盡方法搵啲有信譽嘅食肆，但仲係唔多放心。
之不過喺香港就完全冇有怕，皆因香港嘅食物監察嚴謹好多，所以佢可以好放心咁出街食嘢，每次返內地屋企時，仲會買定啲奶粉帶返去畀囝囝。
（余絲韻）