調虎離山傳媒呆等
招行公關大員最初話，今年冇安排傳媒採訪，又強調只有股東能參與股東會，絲絲十分理解，經過一輪爭取後，招行公關話希望喺中場休息時間能夠盡量安排記者入會場，但就建議一邊等一邊飲咖啡，大家就咁中咗「調虎離山計」，呆等一個半鐘都冇聲氣，於是立即趕回會場，點知股東會已近尾聲，公關大員出現面前，話未能畀傳媒參與，記者最終與管理層緣慳一面。
招行首季盤數咁「靚仔」，加上又冇乜嘢不利消息，照道理唔使怕見香港記者，呢個安排真係令人摸不着頭腦。招行股價一直硬淨，行長馬蔚華可謂功不可沒，有小股東會後同絲絲講，話會上不斷有人讚馬行長工作表現好，仲問定佢喺任期結束後會唔會連任添。
（余絲韻）