市場熱線：中電信具值博率
港股連升五日，恒指尋日再升66點收報23,184點，但成交僅超過500億元。港股五月尾發「窮」惡，但五日平均升唔夠100點，個市仲係冇乜方向，尋日結算嘅五月期指由頭揸到尾嘅話，淡友贏得600點左右，食唔到大茶飯。古勝四月睇升，五月睇跌，雖然睇啱咗方向，但其實只係估啱咗一半，因為今年到依家只係上落市格局，等待中嘅單邊市仲未出現，六月表面睇有機會係大風暴，美國QE2月尾結束，而希臘隨時宣布賴債，當然最重要睇套息交易幾時拆倉。
I.T業績靚或反彈
尋晚美國冇市，A股8連跌毫無起色，同港股5連升差得遠。祖國錢莊同農民境況一樣──都係缺水，據聞大耳窿嘅息口已去到幾十厘，所以搶劫不如炒股、炒股不如做大耳窿，A股咁疲弱的確有道理。A股未來仲有好多嘢驚，聽日會有PMI公布，有機會繼續萎縮，旱災話會刺激五月通脹「超五」，照兩個月加息一次嘅走勢，六月多數會加息，而祖國尋日調高咗工業電費，對電力股來講都算好消息，因為工業用電佔發電量大部分，但電力股股價已反映咗加價消息。
畀人唱衰後罕見由公司出通告駁火嘅利豐（02909）反彈3.8%，水泥股亦翻炒，本地零售股繼續標青，I.T（00999）尋日收市後派成績表，但股價反高潮，跌咗5.5%，而全年賺多48%，計落PE稍低於20倍，今日可能會有反彈，但喺賣衫股當中仍係屬於最貴。「趴打」就快上市，講貴價時裝嘅同類股係JOYCE（00647）同寶姿（00589），JOYCE喺下個月會派成績表，有一定睇頭。
古勝尋日提及嘅敏華（01999）升近7%，其實好多隻之前大跌嘅股都反彈，最明顯係TCL通訊（02618），大升14.4%，理由係阿媽增持，但阿媽增持唔夠兩球，只係象徵式支持。
同係手機股，中國無線（02369）繼續捱沽，金手指基金忍痛斬情絲，而佢另一隻揸重貨嘅股瑞金（00246）發通告話帳目冇問題，但就唔肯復牌，喺網上討論區瑞金被唱條數有假，在下都唔敢亂咁估，但金價創新高，隻股反而一路跌，買股千祈唔好貪便宜。
等候母公司打補針
祖國電訊股獲大摩唱好，聯通（00762）升2.86%再創新高，中國電信（00728）則微升0.6%收報4.59元，但總算升破下降軌。中電信及唔上聯通嘅最大分野係「哎瘋」，「CDMA版哎瘋」一再延期，有人擔心可能會觸礁，但其實唔使咁驚，呢樣只係遲同早嘅問題，到「哎瘋」推出有時之後，中電信應該可以有大龍鳳。
股票講賣點，中電信同祖國移動（00941）只係穩紮穩打，但中電信除咗等緊「哎瘋」等到頸都長之外，亦等緊出年阿媽注入資產，打針規模高達1,000億元，絕對唔嘢小，所以股東要有啲耐性。雖然古勝周不時推介聯通，但論值博率，聯通已升到咁高，不如博中電信好過。
戰報
六福集團（00590）+14%
古晨上周三吼中嘅六福繼續受捧，昨高見33.35元，以推介日低位29.2元計，最多賺超過14%。
碧桂園（02007）+13%
帥哥於十九日吼中隻碧桂園，當日低位3.14元，尋日炒高至3.55元，走番轉最多可賺超過13%。
古勝