孖妹缸湖遊：十大金融謎團揭秘

《金錢大帝》作者金道夫喺香港、倫敦同紐約三大金融中心打滾咗十幾年，曾任職於華爾街大行同國際律師行，做過上市、合併及分析等實務工作，因為寫嘅博客大獲好評，之後出咗呢本著作，遲啲仲會出多本關於地產投資嘅新書添！佢話一般人只係睇到投行職員可以賺大錢拎花紅，對佢哋工作了解唔深，呢本書最啱行外人睇，因為坊間好少書會解釋投資銀行唔同部門嘅運作。

金：《金錢大帝》作者金道夫

祺祺：邊啲金融產品最呃人？我哋點先避到呢啲陷阱？

金：小存戶最驚銀行推銷高息產品，因為高風險先有高息；散戶鍾意買細價股同窩輪，輪證相關資產短期走勢難測，大部分散戶都會損手；至於私人銀行客最驚創新產品，好似依家興金銀類似累計期權嘅創新產品，客人可能要簽一年約甚至綁死18個月。如果半年後潮流一過價格大跌，可能會輸好多錢；大企業要小心投行賣啲所謂「免費對沖」產品，產品下跌風險無限大，萬一想對沖嘅資產價格暴挫，到時可能輸多10倍或100倍。

高妹：大企業做對沖蝕大本係咪好普遍？

金：一般大公司由中級財務人員做對沖，但預算好多。最簡單嘅對沖方法係買期貨、期權，期權就好似保險合約，企業唔使受價格風險所傷，但要畀一筆溢價，有啲公司唔肯畀錢，大行就向佢哋推銷「免費對沖」，要求企業買入期權同時以較低價將某啲期權賣番畀銀行，間接畀咗溢價，對沖商品或貨幣一旦跌破企業沽畀銀行嘅期權行使價，就可能會蝕大本。之前油價大跌，好多航空公司突然輸幾億元，而且文件仲要求佢哋要喺兩日內要補孖展，拎唔到錢出嚟要被斬倉。

強積金宜選低收費

祺祺：中信泰富（00267）之前因捲入累計期權出事，我哋小市民啲強積金更避唔過畀金融企業抽水嘅厄運。

金：我哋有權選擇以前份工儲落嘅強積金點投資。若將來「強積金自由行」，我哋可以將資金由收費高如2%嘅強積金公司轉到低於1%嘅受託人，從中慳唔少；要提高回報可以主動轉換計劃，當股市熾熱時揀保守計劃，跌市就揀啲進取嘅。

高妹：呢排咁多新股上市，投行為首次公開發售（IPO）護航係咪有咩蠱惑o架？

金：作為「紅娘」嘅投行好少造假到好似歐亞農業咁離譜，但一般企業新上市都會化妝，好似女仔去約會時都會扮靚啲，上市嗰時盈利數字會特別高，有高增長假象，股價會有水分，但一年半載後公司就會原形畢露，股價當行業熱情不再時可能跌。

包銷商用透過「增售」（Greenshoe）機制（超額配售權）穩定價格，一般可對投資者增售額外15%股份配售權，如新股跌穿招股價可無本生利，以低於招股價喺盤後市場買番股份，賺取招股價與買入價嘅差額。

祺祺：「財經演員」平時推介嘅股份，係咪可以留意？

金：中型證券行員工寫專欄、上電視以提高知名度，之後可以做投資產品代言人。有啲財經演員可能會喺推銷股份前買咗先，但需要申報。有啲人覺得咁做係利益衝突，有啲人反而覺得係好事，反映佢哋對推介有信心。可能有人會離譜到收咗某啲公司錢再作推介，但數目唔多，廉署都捉過。

稅率低利對沖基金

高妹：「賺錢之神」普爾遜最近喺香港設立辦公室，都係貪香港近水樓台，可以進攻內地市場。

金：香港金融體制成熟而且配套好，對沖基金通常搵投行做主要經紀商，呢度有好多投行可以提供多項服務，最重要係當局對沖基金監管唔嚴謹，而香港稅率低，賺大錢嘅對沖基金如果喺英國可能要畀40%稅，香港只收佢16%，可以慳番好多。

祺祺：點解你話輪商發新輪時好似開賭枱咁？之前有投資者向德銀交易員行賄，都賺到錢吖！

金：散戶除非有內幕消息或同交易員夾定，又或者係計數叻過銀行，可以計到差價，否則一般都會輸錢。

高妹：我見啲大行報告成日調整目標價，但股份基本因素應該唔會成日變o架！

金：當股價升時，大行報告分析員不斷調高目標價，跌市初段唔會調整，到股價同目標價差太遠，先突然大幅調低目標價。佢哋重視花紅制度，而主宰薪金嘅年尾排名，取決於推介股份表現，所以較短視，唔似股神巴菲特咁，股票買咗會放10年、8年。就算分析員搵到長線大升嘅股票，如果推介完因市況大跌，受客戶、排名同花紅壓力，佢哋都要調整目標價。

綜合基金雙重收費

祺祺：綜合基金係基金中嘅基金，係咪可以分散投資？

金：佢哋設雙重收費，投資基金收一重費用，而因為佢哋係基金中嘅基金又收多重。好似近期基金回報只有5%，兩重收費後仲剩番幾多回報畀投資者？如果真係要分散投資，買指數基金收費較平。

高妹：場外交易（OTC）對場內有咩影響？

金：場外交易本身畀人做對沖，係一件好事，但OTC規模比實際市場大10倍以上，有九成以上都係投機活動而非做對沖。金融海嘯前，或者大家會覺得投機活動有助「價格發現」（Price Discovery），價格郁得快啲之餘仲可以增加交易量，但當場外交易大過場內咁多，會令價格波幅好大。

86%股友本月蝕錢

港股顯現「五窮」，本周初恒指再度失守23,000點關，部分中資股更被洗倉。今個月你的股票投資損手多少？據《東方日報》網上民調截至上周六晚上6時結果，蝕三成以上嘅有31.9%，損失一至三成嘅佔36%，18.4%蝕一成以下，話打平手嘅有4.6%，剩番9.1%反而有賺。換言之86.3%人蝕錢。

高妹、祺祺

若有料報畀高妹同祺祺或有嘢問，可電郵money.biz@opg.com.hk