市場熱線：中煤短線博反彈

雖然個市近期回升，「中投三寶」上周五亦卒之反彈，但有好多二三線股跌得好慘，上周五輪到內地百貨股洗倉，金鷹（03308）、新百貨（00825）同百盛（03368）全部跌5%以上，但本地零售股命水好好多，尤其係金飾股。本地零售業都係靠祖國同胞撐場，但點解表現差咁遠呢？古勝相信祖國熱錢流走的確存在，趁住依家祖國錢莊水緊，攞返內地做大耳窿收息直情好過炒股票，所以同胞愛股尤其係民企呢排跌得特別傷。

敏華價殘不合理

敏華（01999）定咗下月中派全年成績表，同時話自己喺美國傢俬市場升到前10位，而且係增長速度No.1，點睇都應該係好消息，但隻股喺上周五先升到8.33元，然後隊到落7.55元，收市仍下跌4仙，報7.95元。

敏華曾經炒到上最高14.9元，依家質到得番一半，公司中期賺多45.7%，計落全年PE唔夠10倍，究竟點解呢排表現咁差呢？惟有用莊家要錢唔要貨去解釋。

當然，唔單止香港上市嘅民企跌得慘，A股呢排弱過藥煲，同香港一樣，百貨零售股係重災區。雖然話零售股捱沽，但國美（00493）同聯想（00992）用業績講明內地消費好景，股價表現亦對辦。相反，太平洋恩利（01174）同金山軟件（03888）兩隻盈利倒退嘅股則跌到反肚，前者一度跌穿1蚊關口，古勝都唔係好明間公司不斷集資，但負債比率依然係咁高，仲要搞到盈利倒退。

市盈率較同業低

古勝一向睇好煤炭股，雖然依家祖國搞到鬧電荒，矛頭指向電煤價格太高，但兗煤（01171）同神華（01088）仍幾硬淨，同五十二周高位比較分別只差4.5%同2.1%。

不過隻中煤能源（01898）就走晒樣，同五十二周高位差咗32%，本月中更跌破10元，創下近月低位9.54元，上周五最後收報10.14元，講走勢係明顯落後。

睇中煤間公司冇乜唔妥，頭4個月煤炭總銷量升咗21.5%；當然，中煤同其他兩間煤炭H股最大唔同係做埋煤礦設備，由於限制產能嘅關係，呢項業務出現倒退，跑輸畀兗煤同神華唔出奇，但差咁遠就令人有啲意外。中煤今年預測PE係11.5倍，係3隻煤股中最低，所以短線揀佢有追落後價值，最多係跌穿上次低位就止蝕，上升空間博一成左右。

戰報

英皇鐘錶珠寶（00887）+10%

Dr.Stock於十二日推介隻英皇鐘錶珠寶，當日低位1.2元，上周五最高見1.32元，跟到足賺一成。

六福（00590）+11%

帥哥於二十日吼中嘅六福亦見落鑊，上周五高見32.8元，以推介日低位29.5元計，最多賺逾11%。

古勝