尋日港股市況同天氣一樣，都係烏天暗地，在恒指跌近500點的大環境下，唔使跌嘅股票已經算唔錯，仲有得升嘅就更加難得，昌興國際（00803）便屬其一。
講起昌興，代表作自然係於去年向台泥（01136）出售旗下水泥業務，一鋪過套現38億元，之後集團轉型發展內地房地產業務同鐵礦石業務，繼去年斥資8.2億元收購持有多項廣州物業之義德後，早前又剛斥資3.9億元人民幣，購入杭州一幅商業用地，另外又收購了馬來西亞鐵礦石合營公司70%股權。雖然未知新收購業務的表現如何，但昌興有大量現金揸手已是賣點。
截至去年九月底，集團手頭現金及現金等值仍有20.15億元，以其已發行股數約63.95億股計，相當於每股0.315元，幾乎係現股價嘅六成。其股價上月於0.4元見底後，本月最高曾升見0.61元，之後調整回落，昨日逆市做好，升0.01元，收報0.53元，不妨順勢跟進，博其重返前高位，止蝕0.48元。
詩詩