絲絲講場：姚君達一家大細撐場
米蘭站（01150）尋日氣勢如虹，主席姚君達為咗同家人分享重要時刻，叫齊一家大細出席掛牌儀式，佢又着咗件「飲衫」出場，係人群之中好耀眼，佢就成朝四萬咁口周圍招呼嘉賓。而公司就搵人造咗個手袋形蛋糕，送畀港交所，即場請所有嘉賓食晒個蛋糕，等嘉賓唔使淨係食蝦餃燒賣「咁dry」。
姚媽媽攞住名牌袋滿場飛
姚君達細老姚君偉同埋細妹姚秀慧，依家都喺米蘭站打工，係公司嘅高層，三兄妹當然出席上市儀式，難得姚爸爸及姚媽媽都一齊見證歷史時刻。米蘭站貴為「超購王」，廣受散戶追捧，姚媽媽飲得杯落，佢仲讚姚君達自小就好乖，今次姚君達身家暴漲，相信佢都老懷安慰。絲絲見到姚媽媽攞住個名牌手袋周圍去招呼嘉賓，姚君達應該送咗唔少名牌手袋畀老媽子。
港交所（00388）主席夏佳理同行政總裁李小加一齊出席上市儀式，真係高度重視佢哋，以往只有大型集資新股先蒲頭。雖然米蘭站唔喺來自外國嘅國際名牌，但個名有「米蘭」兩個字，又賣外國牌子，都算半個外國公司。