年報係公司向投資者「交代」嘅渠道之一，華創（00291）深明此道，於是做咗樣「創舉」，十年以嚟第一次換咗間全新嘅年報設計公司，度身訂造咗一份具創意又獨特嘅年報。
講到係「創舉」咁大件事，咁設計公司咪有排震？絲絲老友話，華創管理層都怕設計公司有壓力發揮唔到水準，所以實行咗佢哋做生意嘅理念──持開放態度，先至可以不斷進步咁話，放手畀設計公司去搞，勢估唔到效果出奇地好，新鮮出爐嘅笑面圖案年報令管理層好滿意。
年報封面個大笑面圖案，係依家訊息時代常用嘅符號，代表着時尚同埋貼近潮流嘅象徵，係作為零售企業滿足市場同埋顧客需求所要具備嘅關鍵元素；再細睇，個笑臉圖案仲包含咗華創標誌嘅元素，最搞鬼嘅係個封面底部仲有個「Like」嘅標誌。