絲絲講場：梁高美懿驟變「晚輩」
絲絲識好多企業管理層，近排每次見面，話題少不免關於依家後生仔打工態度，雖然當中都有出類拔萃之人才，但普遍印象係工作態度差，遇到有少少唔滿意或者比較辛苦嘅工，好輕易就辭工唔做。尋日絲絲見到一班喺恒生銀行（00011）服務咗30年嘅員工，同依家一般打工仔年年跳槽真係分別好大。
為咗多謝呢班咁忠心及默默耕耘嘅員工，恒生副董事長兼行政總裁梁高美懿專登親自頒獎畀服務咗10年、20年及30年嘅優秀員工。梁太加入恒生只有兩年，佢笑住話對住年資30年嘅同事，自己變成「晚輩」。
盛讚員工是寶
數吓手指計算，達到呢個服務年期嘅員工，竟然有500位，所有得獎者合共為公司服務超過一萬年，學「柴九」話齋，人生有幾多個十年，佢哋真係貢獻晒成個人生。
梁太對佢哋真係有讚冇彈，仲向佢哋及佢哋嘅家人表示衷心感謝，又盛讚員工係公司嘅「寶」，希望佢哋貫徹恒生「用心」嘅文化，以「專心、關心、真心」嘅態度，繼續為客戶及身邊同事服務。梁太唔係齋得把口讚，佢代表銀行送出紀念金幣及感謝狀，表揚員工為公司多年來嘅付出。
（余絲韻）